Алматыда аналар мен балалар денсаулығына арналған халықаралық конференция өтті.
Алматыда «Салауатты ұрпақ – Қазақстан болашағы» атты III Халықаралық ғылыми-практикалық конференция өтті. Іс-шара аясында әлемдік деңгейдегі Live-surgery шеберлік сабақтары ұйымдастырылып, 15 жоғары технологиялық операция тікелей эфирде көрсетілді, деп хабарлайды aqshamnews.kz.
ДСМ мәліметінше, форум жұмысына Алматы қаласы әкімінің орынбасары Әсем Нүсіпова мен ҚР Денсаулық сақтау министрлігінің өкілдері қатысты. Шара барысында алғаш рет елімізде феталдық хирургия мен “Бір күндік клиника” жобасы таныстырылды.
Перинатология және балалар кардиохирургиясы орталығының базасында өткен конференцияға Қазақстан, Ресей, Үндістан, Италия, Қытай, Израиль сынды елдерден 600-ден астам медицина маманы қатысты. Олар сирек кездесетін патологияларды емдеудегі жаңа тәсілдермен танысып, тәжірибе алмасты.
Конференцияда жетекші сарапшылар акушерлік, педиатрия, генетика және репродуктология салаларындағы заманауи жетістіктер жайлы баяндама жасады. Шара медициналық білім алмасудың маңызды алаңы болып, Қазақстандағы ана мен бала денсаулығы саласындағы ілгерілеуді көрсетті.