Ауқымды жиын 14–16 мамыр күндері офлайн және онлайн форматта өтіп жатыр.
Конгреске Қазақстан мен шетелден келген жетекші дәрігерлер, ғалымдар, денсаулық сақтау саласының сарапшылары қатысуда.
Ұйымдастырушылар мерейтой қонақтарын ұлттық музыкамен, дәстүрлі қонақжайлықпен қарсы алды.
Жиын басталар сәтте орталықта қызмет еткен марқұм әріптестерді бір минут үнсіздікпен еске алды. Одан кейін орталықтың тарихынан сыр шертетін қысқаметражды деректі фильм көрсетілді.
Конгрестің ашылу салтанатын орталықтың басқарма төрағасы, м.ғ.к., қауымдастырылған профессор, MBA иегері Гульфайруз Уразбаева жүргізді. Алғашқы құттықтау сөзді ҚР Денсаулық сақтау министрі Ақмарал Альназарова онлайн форматта жолдады.
Салтанатты шарада медицина ғылымдарының докторы, профессор, Қазақстанның еңбек сіңірген қайраткері Нина Каюпова, Сенат депутаты Айнұр Арғынбекова, Мәжіліс депутаты Гүлдара Нурумова, академик, ҚР Президенті жанындағы Ұлттық ғылым академиясының мүшесі, Қазақстан репродуктивті медицина қауымдастығының президенті Вячеслав Локшин, сондай-ақ Өзбекстан, Қырғызстан және басқа елдерден келген шетелдік сарапшылар құттықтау сөз сөйледі.
Пленарлық отырыстарда заманауи акушерліктің өзекті мәселелері; ана мен бала денсаулығын қорғаудағы ғылыми және білім беру үрдістері; репродуктивті медицинадағы жасанды интеллект; ала туу көрсеткішін арттыру жолдары; орталықтың халықаралық ынтымақтастықтағы рөлі туралы мәселелер талқыланды.
Конгресс аясында шеберлік сабақтары, ғылыми мектептер, неонатология, генетика, УДЗ, репродуктивті денсаулық бойынша сессиялар өтуде. Сонымен қатар медициналық құрал-жабдықтар мен фармөнімдердің арнайы көрмесі ұсынылған.
Профессор Нина Каюпова өз сөзінде: «Біздің орталықтан 47 доктор дайындалды. Бұл – Қазақстан ғылымына қосылған үлкен үлес. Ең бастысы – бұл өмір сыйлайтын мамандық. Ақ халатты жандар әрбір ана мен әкенің қуанышына себепші бола алады», – деп атап өтті.
Айта кетейік, ана мен бала саулығы жолындағы жарты ғасырлық еңбектің, ғылым мен тәжірибе үндестігінің символына айналған мерейтойлық шара үш күн – 14, 15, 16 мамырға дейін жалғасады.
Репродуктивті денсаулық – ұлт болашағының кепілі
Вячеслав ЛОКШИН, академик, ҚР ҰҒА мүшесі, Қазақстан репродуктивті медицина қауымдастығының президенті:
– Бұл орталық – еліміздегі акушерлік-гинекологиялық қызметтің көшбасшысы. Репродуктивті денсаулық – ана мен бала саулығының негізі. Қазір елімізде ана өлімі 7–8 есеге азайып, Шығыс Еуропа деңгейіне жетті. Феталдық хирургия, ЭКО технологиялар қолжетімді. Жыл сайын 6 мыңнан астам сәби ЭКО арқылы дүниеге келеді. «Аңсаған сәби» бағдарламасы аясында 30 мың процедура орындалып, 11 мың бала туылды. Алайда әсіресе ауыл тұрғындары ЭКО жайында толық ақпараттанбаған. Мемлекет есебінен 18 клиникада ЭКО тегін жасалады.
Сонымен қатар, ерлердің репродуктивті денсаулығы да назарда болуы керек. Артық салмақ, дұрыс тамақтанбау бедеулікке әсер етеді. Жастарға жыныстық сауаттылықты мектептен бастап үйрету маңызды.