Биыл алғашқы жартыжылдықта атқарылған маңызды жұмыстардың бірі спортшылар мен жаттықтырушыларға берілетін ай сайынғы ақшалай қамсыздандыру жүйесін жетілдіру болды, – деп хабарлайды aqshamnews.kz тілшісі. Бұл туралы Алматы қаласы Спорт басқармасының өкілдері хабарлады.
Алматыда спортшылар мен жаттықтырушыларды мемлекеттік қолдау жүйесін кеңейту бойынша жұмыстар жүргізіліп, ай сайынғы ақшалай қамсыздандыру алушылардың саны едәуір көбейді.
Қабылданған шаралардың арқасында жоғары спорттық жетістіктері үшін ай сайынғы ақшалай қамсыздандыру алатын спортшылардың қатары айтарлықтай кеңейді. Бұрын мұндай төлем негізінен ересектер санатындағы спортшыларға ғана тағайындалса, бүгінде қолдау жүйесі жасөспірімдер мен жастар санатындағы спортшыларды, сондай-ақ паралимпиадалық, сурдлимпиадалық және командалық спорт түрлерінің өкілдерін де қамтиды.
Соның нәтижесінде ай сайынғы ақшалай қамсыздандыру алатын спортшылардың саны 244-тен 925 адамға дейін, ал жаттықтырушылардың саны 28-ден 341 адамға дейін өсті. Қолдау жүйесінің кеңеюі спортшылар мен мамандардың біразын тұрақты мемлекеттік қолдаумен қамтамасыз етіп, спорт резервін сапалы даярлауға және халықаралық аренада жоғары нәтижеге қол жеткізуге қосымша мүмкіндік беріп отыр.