Былтыр «Абай» баспасынан шыққан 35 кітаптың тұсаукесері өткенде баспа ұжымының «алдағы 2024 жылы қазақтың көркем әдебиет туындыларын 100 томдыққа жеткіземіз» деген уәдесі бар еді. Биыл баспа сол уәде үдесінен шығып, 100 емес, 155 кітап басып шығарды.
Баспадан қазақ әдебиетінің классик ақын-жазушыларының шығармаларынан жасақталған бірегей туындылармен қатар, балалар мен жасөспірімдерге арналған шығармалар да жарық көрген. Баспа тек қана көркем әдебиет саласында ғана емес, ғылымға да көңіл бөле отырып, оңайлықпен қолға түсе бермейтін, іздегенге таптырмас академиялық зерттеу еңбектерімен толыға түскен.
Сондай-ақ көркем әдеби кітаптардан бөлек, биыл баспадан діни-рухани бағыттағы, тарих саласындағы, салт-дәстүр, ауыз әдебиетінің жауһарлары жарық көріп отыр. Олар: «Ұлы тарих және Ұлы әулиелер», «Ұлы дала тарихы», «Тараз — өркениеттер өрімдерінің куәгері», «Қарахан баба мен Айша бибі», «Алтыбармақ», «Тұрмыс салт жырлары», «Батырлық жыр дастандар», «Лиро-эпостық жырлар», «Тұрмыс салт ертегілері», «Аңыз-әңгімелер», «Қиял-ғажайып ертегілер», «Ауыз әдебиетінің шағын түрлері», «Хайуанаттар туралы ертегілер» және тағы басқалар.
— «Абай» баспасынан жарық көрген көркем әдебиет кітаптарының көшін Дулат Бабатайұлы, Хәкім Абай, Шәкәрім, Мәшһүр Жүсіп Көпейұлы бастап, Мұхтар Әуезов, Алашорда қайраткерлерінің шығармалары мен Кеңес Одағы заманының әйгілі қаламгерлері жалғастырып отыр. Сонымен қатар, баспа оқырманның сөресін Тәуелсіз Қазақстанның көрнекті жазушылары мен белгілі жас авторлардың шығармаларымен толықтырды. 155 кітап та әлемдік сұранысқа сай, заманауи үлгіде, бояуы қанық дизайнда жарық көрді. Олар қалың оқырман талғамынан шығып, кітапсүйер қауымды қуантады деп сенеміз, — деді белгілі қаламгер, “Абай” баспасының директоры Ақберен Елгезек.