Қатысушылар Абайдың «Қара сөздерінің» бүгінгі қоғамдағы маңызын талқылады, деп хабарлайды aqshamnews.kz тілшісі.
Алматыда Абай күніне арналған «Нұрлы ақыл – Разум и знания» викторинасының «ABAI LIVE: 45 СӨЗ – 45 ОЙ» тақырыбындағы іс-шарасы өтті.
«Толық адам» жобасын іске асыру аясында ұйымдастырылған кездесу жастарды ұлы ойшылдың әдеби, философиялық және музыкалық мұрасын зерделеуге біріктірді. Іс-шараға этномәдени бірлестіктердің өкілдері, жастар және қала тұрғындары қатысты.
Заманауи интерактивті форматта өткен іс-шара барысында қатысушылар Абайдың шығармашылығы мен философиясына арналған зияткерлік викторинаға қатысып, «Қара сөздерінің» бүгінгі қоғамдағы маңызын талқылады. Сонымен қатар жастар Абайға арнаған авторлық хаттарын оқып, шығармашылық қойылымдар ұсынып, ақынның музыкалық шығармаларын орындады.
Іс-шараның негізгі мақсаты – Абай мен ХХІ ғасыр жастары арасында символикалық диалог қалыптастырып, оның әдеби, философиялық және музыкалық мұрасын қазіргі заман тұрғысынан пайымдауға мүмкіндік беру. Қатысушылар Абайдың 45 қара сөзі негізінде білім мен еңбек, әділет пен жауапкершілік, Отанға деген сүйіспеншілік, адамгершілік құндылықтар мен тұлғалық даму тақырыптарын талқылады.
«ABAI LIVE: 45 СӨЗ – 45 ОЙ» жастардың ұлттық мәдениетке қызығушылығын арттырып, рухани мұраны заманауи форматта танытуға және ашық пікір алмасуға мүмкіндік берген шығармашылық алаңға айналды.
Іс-шараны Алматы қаласы Ішкі саясат басқармасының Қоғамдық даму орталығы мен «Ақпараттық-ресурстық орталық» қоғамдық қоры Медеу ауданының Жастар Community Center-імен бірлесіп ұйымдастырды