766 «Сергек» автоматтандырылған бағдарламалық қамтамасыз ету жүйесі жұмыс істейді
Алматы қалалық полиция департаментінің әкімшілік полиция басқармасының аға инспекторы Самат Әбжапаров қалада жол ережесін бұзған көлік жүргізушілерден айыппұл өндіру шаралары туралы айтты, деп хабарлайды Almaty-akshamy.kz ҚазАқпаратқа сілтеме жасап.
Спикердің айтуынша, Алматыда автоматты режимде 766 «Сергек» автоматтандырылған бағдарламалық қамтамасыз ету жүйесі жұмыс істейді, бұл дегеніңіз - 5034 бейнекамера. «Олар қалада жылдамдықты асыру, жол белгілерін елемеу, бағдаршамның тыйым салынған түсіне өту және қоғамдық көлікке арналған жолақпен жүру секілді әкімшілік құқық бұзушылықтарды анықтайды. Аталған құқықбұзушылықтар бойынша әкімшілік нұсқаулар Әкімшілік өндірістің бірыңғай тізілімі өңдеу орталығының деректер базасында қалыптасады. Одан соң көлік иелеріне смс-хабарламалар жіберіледі. Көлік иелері әкімшілік айыппұлды 7 күн ішінде 50% жеңілдікпен төлейді. Жеті күннен соң айыппұл 100% сомаға ауыстырылады және 30 күн ішінде ерікті түрде төленеді. ҚР ӘҚБтК-нің 894-бабына сәйкес, 30 күн өткен соң мәжбүрлеп төлету үшін Жеке сот орындаушылар палатасына жолданады», – деді Алматы қаласы ПД ӘПБ-ның әкімшілік тәжірибе бөлімінің аға инспекторы Самат Әбжапаров.
Ол сондай-ақ қала аумағында борышкерлерді, өз еркімен әкімшілік айыппұлды уақтылы төлемеген адамдарды анықтау бойынша тұрақты түрде шаралар қабылданып жатқанын атап өтті.