Алматыда көшедегі заңсыз сауданы жою мақсатында 306 заңсыз орнатылған стационарлық емес сауда нысаны (СЕСН) мен 222 ойын-сауық аппараты (күш өлшеуіш) бұзылды. Сонымен қатар, мемлекеттік жер қорында заңсыз тұрғызылған 32 күрделі құрылымды мәжбүрлеп бұзу үшін сотқа талап-арыз жіберілді.
Қалған 139 СЕСН-ді бұзу жұмыстары биыл 31 наурызға дейін аяқталады. Қазіргі уақытта коммуналдық қызмет бұл нысандардың заңсыз қосылған инженерлік желілерін өшіру жұмыстарын жалғастыруда.
Жергілікті тұрғындар заңсыз нысандарды бұзу бастамасын қолдайды.
«Бұл дүңгіршектер жүріп-тұруға кедергі келтіріп, ретсіздік туғызды, ал кейбір сатушылар қоқысты тротуарға тастап кететін», – дейді алматылық тұрғын Әлия Сәрсенова.
«Бұрын мұнда сапасы күмәнді тамақ сататын дүңгіршек болған. Өнім сақтау жағдайы санитарлық талаптарға сай емес еді. Қазір бұл жер денсаулық үшін, әсіресе балалар мен жастар үшін қауіпсіз болды», – дейді зейнеткер Сергей Иванов.
Еске салайық, Алматы әкімі Ерболат Досаевтың тапсырмасымен 2025 жылдың 4 ақпанынан бастап Кәсіпкерлік және инвестициялар басқармасы Жұмыс тобымен бірлесіп, өздігінше орнатылған СЕСН-дерді жою жұмыстарын бастаған болатын.
Қалада заңсыз СЕСН-дерді алып тастау жұмыстары жалғасып отыр.