Халықаралық балаларды қорғау күніне орай Алматы қаласындағы №59 мектеп-гимназияда «Балалық шақ мәңгі болсын!» атты ерекше мерекелік шара ұйымдастырылды. Оған 300-ге жуық оқушы қатысты.
Мәдени іс-шарада әппақ футболка мен шапка киген балалар «Әрқашан күн сөнбесін!» әнін айтып, ұжымдық флешмоб биледі. Бірі сурет салып, бірі ән шырқап, барлығы бірдей ортақ би билеген оқушылар мерекенің сәнін келтірді.
Мектеп ауласы да мерекеге сай безендірілген. «Ұлы дала ұрпағы» атты этнолагерьдің баннері ілінген аулада киіз үй де бар.
Флешмобтың мақсаты - балалық шақтың жарқын сәттерін бейнелеу, би мен ұжымдық әрекет арқылы шаттық пен мейірімділік атмосферасын қалыптастыру.
Мектеп-гимназия директоры Асан Торғанбековтың айтуынша, бұл шара Алматы қаласы Білім басқармасының арнайы жоспары негізінде 22 мамыр мен 1 маусым аралығында өткізілуде.
"Оқушыларымыз жазғы демалысқа көтеріңкі көңіл-күймен шықсын деген ниетпен осындай шара ұйымдастырдық. Мектеп жанынан этнолагерь аштық. Оған келетін балалар күн сайын Қаражорға биімен жаттығу жасап, ұлттық ойындарға қатысады. Мұндай шаралар оқушыларымыздың бос уақытын мазмұнды өткізуге сеп болады. Ал жалпы, балалар мерекесі – әр баланың жүрегінде шаттық пен үміт оятатын ерекше күн. Біз жыл сайын бұл мейрамды көтеріңкі көңіл-күймен қарсы алып, шәкірттеріміздің шығармашылығын дамытуға мүмкіндік береміз", – дейді Асан Ержанұлы.
Айта кетейік, биыл мектепті 1355 оқушы аяқтап отыр. Оның ішінде 11-сыныпты – 77 түлек, 9-сыныпты – 156 оқушы тәмамдады. 11-сыныптан 7 оқушы – «Алтын белгіге», 4 оқушы – «Үздік аттестатқа» үміткер. Ал 9-сыныптардан 25 оқушы «Үздік аттестатқа» ұсынылған.