Алматыда және Қазақстанда ЭКО бағдарламаларының саны тұрақты түрде өсіп келеді, бұған мемлекеттік қолдау және халықты ақпараттандырудың жоғарылауы ықпал етуде.
Бұл туралы өңірлік коммуникациялар қызметінің баспасөз конференциясында «Экомед» клиникасының репродуктивті маманы Айгерім Ахметова мәлімдеді, деп хабарлайды aqshamnews.kz.
«Соңғы төрт жылда «Аңсаған Сәби» бағдарламасы аясында 28 мың ЭКО шарасы жасалып, соның арқасында 10 мыңнан астам бала дүниеге келді. Алматыда бұл бағдарлама 562 әйелді қамтыса, оның 246-сы ана атанды», - деді репродуктолог.
Маман ЭКО-ға қызығушылықтың артуының негізгі себептерінің қатарында технологиялардың дамуын, кеш босанулардың көбеюін және бедеулік диагностикасының жақсаруын атайды.
«Бүгінгі таңда Қазақстандағы ерлі-зайыптылардың 16-17%-ы бала көтеруде қиындықтарға тап болады және көп жағдайда ҚРТ олар үшін сенімді шешімге айналады. Алматыда ЭКО-ға маманданған 11 емхана бар, бұл қаланы репродуктивті медицина орталығына айналдырады», - деді Ахметова.
Сондай-ақ спикер алдағы 5-10 жылда Алматы репродуктивті медицинаның одан әрі дамуын, жаңа технологиялардың енгізілуін және ЭКО қолжетімділігін кеңейтуді күтетінін баса айтты.
«Біз тегін ЭКО-ға квоталардың көбеюін және бедеулікті емдеудің инновациялық әдістерін енгізуді болжап отырмыз. Қазақстанда репродуктивті технологияларды дамытуда Алматы негізгі орын алады», - деп түйіндеді сөзін Айгерім Ахметова.