29 сәуір күні Алматыдағы Ұлттық кітапханада жазушы, «Алаш» халықаралық әдеби сыйлығының иегері Жалғасқали Дүтмағанбетовтың «1812 жыл: Соғыс және Бейбітшілік (Қазақы нұсқа)» атты трилогиясының тұсаукесері өтеді, деп хабарлайды aqshamnews.kz.
Шығарманың басты ерекшелігі — қазақ тарихында көп айтылмай жүрген тақырыптардың архивтік деректер негізінде баяндалуы. Автор Наполеон әскерін өкшелеп қуған орыс әскерінің құрамында ерлікпен шайқасқан қазақ сарбаздарының ерлігін тарихи шынайылықпен көрсетеді. Бұл соғысқа жазушының өз бабалары да қатысқан. Трилогияда олардың тағдыры туралы да кеңінен айтылады: солардың бірі Франциядан Мишель есімді қызды алып келіп, ұрпақ өрбіткен. Бүгінде олардың ұрпақтары әлі де бойларындағы француз қанымен ерекшеленіп келеді.
Кітапта архивтік құжаттармен қоса, тарихи фотосуреттер де берілген, оның ішінде Құлсарыдағы Мишельдің бейітінің суреті де бар.
Трилогия алғаш рет қазақ тілінде жарық көріп, кейін кәсіби аудармашылардың көмегімен орыс, ағылшын және француз тілдеріне аударылды. Аударма сапасына ерекше көңіл бөлген автор Абылай хан атындағы Халықаралық қатынастар және әлем тілдері университетінің мамандарымен тығыз жұмыс істеген.
«1812 жыл: Соғыс және Бейбітшілік» трилогиясы шектеулі таралыммен «Тоғанай Т» баспасынан жарық көрген.