Оқиға Сүйінбай даңғылының бойында болған.
Өткен түнде Алматыдағы Сүйінбай даңғылының бойында №13 әскери қалашық маңында жол-көлік оқиғасы болды, деп хабарлайды Аlmaty-akshamy.kz.
Алматы полиция департаментінің баспасөз қызметі хабарлағандай, оқиға кеше түнде Сүйінбай даңғылының бойында, 13-әскери қалашық маңында болған.
«BMW көлігінің жүргізушісі Сүйінбай даңғылының бойымен оңтүстікке қарай келе жатқан. Шамасы жүргізуші рөлге ие бола алмай қалған. Көлік сырғанап, ағашқа соғылды. Содан кейін инерциямен шам бағанасына соқтығысты», - деді Алматы полиция департаментінің ресми өкілі Салтанат Әзірбек.
2004 жылы туған жүргізуші ауыр жарақат алған. Оны жедел жәрдем бригадасы 4-қалалық ауруханаға жеткізген. Ал 17 жастағы жолаушы алған жарақаты салдарынан оқиға болған жерде мерт болды.
Тергеу жұмыстарымен Алматы полиция департаменті анықтау басқармасының қызметкерлері айналысып жатыр.