Ақсай өзеніндегі салынып жатқан су дайындау станциясы Наурызбай ауданының 100 мың тұрғыны үшін су тапшылығы мәселесін шешеді
Наурызбай ауданындағы су тапшылығын жою мақсатында қуаты тәулігіне 22 мың м³ болатын су дайындау станциясының құрылысы жүргізілуде. Станция 100 мың адамды сумен қамтамасыз етеді. Бұл туралы ШЖҚ «Алматы Су» МКК бас директоры Ілияс Қазиев Өңірлік коммуникациялар қызметінде өткен брифингте мәлімдеді, деп хабарлайды aqshamnews.kz
Құрылыс жұмыстарын биыл қазан айында аяқтау жоспарланып отыр. Сонымен қатар, биыл мамыр айында бұған дейін салынған Қарғалы сүзгі станциясында іске қосу-реттеу жұмыстары аяқталады.
«Су тазарту нысанының жұмыс істеуі үшін қажетті техникалық кәріз коллекторының құрылысы қатар жүргізілуде. Бұл бастапқыда станция жобасына енгізілмеген болатын», – деді спикер.
Аталған коллектордың құрылысы осы жылдың маусымында аяқталған соң станцияны іске қосуға болады. Бұл Қарғалы өзенінен алынатын суды тазалап, халыққа жеткізуге мүмкіндік береді.
Осы жобалардың жүзеге асырылуы Наурызбай ауданы тұрғындарын, оның ішінде Қарағайлы, Құрамыс, Таусамалы, Тастыбұлақ шағын аудандарындағы 50 мың адамды сапалы және үздіксіз сумен қамтуға жол ашады.
Сонымен қатар, қаланың батыс бөлігінде өсіп келе жатқан сұранысты қамтамасыз ету мақсатында қуаты тәулігіне 43 мың м³ болатын «Барлық» су жинағыш жобалануда.