Алматыда заңсыз айналымнан 10 мыңнан астам электронды темекі тәркіленіп, сатушылар мен жеткізушілерге қатысты қылмыстық істер қозғалды, деп хабарлайды aqshamnews.kz.
Бұл туралы 16 тамыз күні Алматы қалалық Полиция департаментінің Криминалдық полиция басқармасының бастығы Максат Канапяев мәлімдеді.
«Киберпол» қызметкерлері вейптерді заңсыз сатумен айналысқан бес адамды ұстады.
«Заңсыз айналымнан әртүрлі өндірушілердің 10 мыңнан астам бір реттік электронды темекілері тәркіленді. Әрбір жағдай бойынша тергеу әрекеттері жүргізілуде. Сатушылар мен осы өнімдерді жеткізумен айналысқан тұлғаларға қатысты Қазақстан Республикасы Қылмыстық кодексінің 301-1-бабы бойынша темекі шекпейтін бұйымдарды, электрондық тұтыну жүйелерін, хош иістендіргіштер мен сұйықтықтарды сатқаны және таратқаны үшін қылмыстық істер қозғалды», — деп мәлімдеді ведомство басшысы.