1 шілде күні Алматы қаласында Қазақстан Республикасының жаңа Конституциясының қабылдануын қолдауға арналған патриоттық флешмоб өтті, – деп хабарлайды aqshamnews.kz тілшісі.
ҚБТУ алдындағы алаңда жүздеген жас Қазақстан Республикасының Мемлекеттік Туын жайып, ел бірлігіне, азаматтық жауапкершілікке және Отанға деген сүйіспеншілігіне қолдау білдірді.
Шараға қатысқан белсенділердің айтуынша, бүгін – Қазақстан тарихындағы маңызды күн. Жаңа Конституцияның қабылдануы еліміздің дамуының жаңа кезеңіне жол ашып, әділеттілік, заң үстемдігі және құқықтық мемлекет қағидаттарын нығайтуға берік негіз қалайды.
«Біз үшін осы тарихи оқиғаның бір бөлшегі болу – үлкен мәртебе. Жаңа Конституция – мемлекеттің басты заңы ғана емес, сонымен қатар күшті, әділетті және өркендеген Қазақстанды бірге құруға деген ортақ ұмтылысымыздың белгісі», – деді акцияға қатысқан белсенділер.
Флешмоб Алматы жастарының белсенді азаматтық ұстанымын айқын көрсетіп, ел болашағының бірлікке, заңға құрметке және әр азаматтың жауапкершілігіне негізделетінін тағы бір мәрте дәлелдеді.