Mastercard мәліметінше, 2024 жылдың 11 айында Алматыда туристердің қанағаттану индексі 67-ге жетіп, өткен жылдың осы кезеңімен салыстырғанда 2,7%-ға артқан. Туристер қауіпсіздік пен қызмет көрсету сапасын негізгі оң факторлар ретінде атап өткен, деп хабарлайды aqshamnews.kz
2024 жылы Алматыда туризм саласы мамандарының біліктілігін арттыруға бағытталған ауқымды жұмыстар жүргізілді. Шілде мен қараша аралығында көлік торабы мен туристермен жұмыс істейтін қызметкерлер үшін ағылшын тілі курстары ұйымдастырылып, 400 адам білім алды. Бұл шетелдік туристермен байланысты жақсартуға және Алматының халықаралық мәртебесін нығайтуға ықпал етті.
Шілде мен қыркүйек айларында Дүниежүзілік туристік гидтер қауымдастықтары федерациясы (WFTGA) ұйымдастырған курстарға 200 гид пен экскурсовод қатысты. Бұл бағдарлама экскурсия қызметтерінің сапасын жақсартуға және Алматының мәдени-тарихи мұрасын кеңінен танытуға мүмкіндік берді.
Қараша айында туризм саласында 420 қызметкер үшін фасилитация тренингтері өткізілді. Оларды Дүниежүзілік саяхат және туризм кеңесінің (WTTC) халықаралық сарапшылары жүргізді. Бұл тренингтер туристік қызмет көрсету сапасын арттырып, басқарушылық дағдыларды дамытуға ықпал етті.
Қыркүйек пен қазан айларында Республикалық жедел-құтқару жасағы (РЖҚЖ) құтқарушыларына арналған бастапқы дайындық бағдарламасы ұйымдастырылды. Бұл Алматының табиғи мұраларға бай аймақтарында туристердің қауіпсіздігін қамтамасыз етуге мүмкіндік берді.
2024 жылы атқарылған бұл жұмыстар Алматыны шетелдік туристер үшін тартымды етіп, қаланың халықаралық беделін арттырды.