Сегіз жыл салынған Өскемен – Талдықорған тас жолы ресми түрде іске қосылды
Халық арасында «Алматы трассасы» деп танымал Өскемен – Талдықорған автожолын жасауға шамамен сегіз жыл уақыт кетті деп хабарлайды aqshamnews.kz
Ұзақ мерзімді құрылыстың басты себептері – пандемия, қаржы мен материалдардың жетіспеушілігі. Алайда бүгінгі таңда жол заманауи талаптарға сай: төрт жолақты магистраль жарықтандыру жүйесімен, жол белгілерімен және екі деңгейлі көлік айырығымен жабдықталған.
«Кейбір учаскелерде жұмыстар 2017 жылы басталған. Басқа учаскелер сол уақытта жобаланған болатын. Пандемия салдарынан құрылыс тоқтатылды, ал одан кейінгі кезеңде жоба құны аздап өсті. Осыған байланысты жобаны түзетуге тура келді», – деді «ҚазАвтоЖол» басшысы Дархан Иманашев.
Жобаны қаржыландыруды Қытай банкі жүзеге асырды, ал құрылыс жұмыстарын қазақстандық-түрік компаниясы орындады. Жалпы, жолды қайта құруға шамамен 300 миллиард теңге жұмсалды. Сегіз жыл ішінде жоба құны шамамен 30 пайызға қымбаттады.
Өскемен – Қалбатау – Талдықорған трассасы Жетісу, Абай және Шығыс Қазақстан облыстарын байланыстырады. Ұзындығы – 768 шақырым. Бұл автомагистраль халықаралық транзиттік тасымалдау үшін маңызды көлік дәлізі болып саналады.