Ол адасып, аспалы жолмен түсуге үлгермей қалған екен.
ТЖМ Жедел құтқару жасағы Алматы тауларынан Кореядан келген жоғалған туристі құтқарды, деп хабарлайды Almaty-akshamy.kz
23 тамызда таңғы сағат 9-да Корея Республикасынан 25 адамнан тұратын делегация "Комби-1" аспалы жолымен көтеріліп, Талғар асуына жаяу жеткен. Гид туристерге бос уақыт берген, бірақ Шымбұлаққа түсіп жатқанда топтың бір мүшесі жоқ екенін байқаған.
24 тамыз күні консулдық өкіл құтқарушыларға жүгінген. Сағат 12:05-те әйелді іздеуге 7 адамнан, оның ішінде бір кинологиялық есептен тұратын ТЖМ РЖҚЖ (Республикалық жедел-құтқару жасағы) құтқарушылары шықты.
Сағат 14:22-де құтқарушылар Сол жақ Талғардан туристі аман-есен тапты. Ол адасып, аспалы жолмен түсуге үлгермей қалған екен. Сәті түсіп, турист үй тауып алып, сонда түнеп шыққан. Шетелдік әйелге медицина көмегі қажет болған жоқ.
"ТЖМ құтқарушылары топтың таудағы қауіпсіз жүріс-тұрысын еске салады: туристік құрамның қатарында міндетті түрде басшы болуы керек. Жүріп өтетін маршрутта топты таратып жіберуге болмайды. Қозғалыс қарқынын топтағы ең әлсіз адамға қарай анықтау қажет. Тек топ басшысының рұқсатымен ғана топтан ажырап кетуге немесе тұрақтауға болады", - деп ескертті ТЖМ мамандары.