Құтқарушылар оларды биіктігі 3 400 метр болатын Рахат шыңынан тапқан.
Республикалық жедел-құтқару жасағының құтқарушылары Алматы тауларында қалып қойған қыз бен жігітті тапты, деп хабарлайды Almaty-akshamy.kz ҚазАқпаратқа сілтеме жасап.
Республикалық жетел құтқару жасағы баспасөз қызметінің мәліметінше, 20 шілде күні Талғар ауданындағы «Ақбұлақ» тау курортының жанында 19 жастағы жігіт пен 16 жастағы қыз Рахат шыңына жаяу көтерілген.
«Олардың серуені түсте басталған, алайда, мақсатты жеріне жеткенде, қараңғы түсіп, кеш батқан. Жастар өз күшін есептемегенін түсінді, алайда төмен түсу оларға қиын болды. Амалсыз көмекке жүгінді. Сағат 22:15 кезінде 7 құтқарушы, оның ішінде кинологиялық топ жолға шықты», - деп хабарлады жасақтан.
Түнгі уақытта іздестіру жұмысы күрделене түскен. 2,5 сағаттан соң құтқарушылар жастарды биіктігі 3 400 метр болатын Рахат шыңынан тапқан.
«Құтқарушылар оларға бүкіл қажетті көмекті көрсетіп, таңғы сағат 04:00 шамасында «Ақбұлақ» базасына жасақ көлігімен жеткізді. Сондай-ақ, жастарға түсіндіру жұмысы жүргізілді»,- деді ведомстводан.