Алматы қаласы еліміздегі цифрлық трансформацияның алдыңғы шебінде тұр. Бұл туралы мегаполис басшысы Дархан Сатыбалды Қала күніне арналған мерекеде сөйлеген сөзінде атап өтті.
«Президент Жолдауында атап өтілгендей, Қазақстанды толыққанды цифрлық мемлекетке айналдыруда Алматының рөлі ерекше. Қазіргі күні елімізде көрсетілетін IT-қызметтердің жартысынан астамы Алматыда жүзеге асуда», – деді шаһар басшысы.
Сондай-ақ ол өз жұмысының басты бағыттарының бірі – IT-инфрақұрылымды дамыту, талантты жастарды қолдау және инновациялық жобаларды ілгерілету екенін баса айтты. Дархан Сатыбалды сөзінде қазіргі таңда шағын және орта бизнес саласы қалада 1 миллионнан астам тұрғынды жұмыспен қамтып отырғанын, әрі осы секторды қолдауға биыл 70 млрд теңгеден астам қаржы бөлінгенін жеткізді.
Әкімнің сөзіне сүйенсек, өндірістік әлеует те артып келеді: Алматы индустриялық аймағы мен «Алатау» АЭА-да жүздеген кәсіпорын жұмыс істеуде. Жоғары сұранысқа байланысты бұл аумақтар кеңейтіліп, инновациялық технологиялар орталығына айналады.
“Туризм бағытында да жаңа жобалар қолға алынуда. Алдағы уақытта іске қосылатын Алматы тау кластері халықаралық сапа мен экология стандарттарына сай құрылып, Орталық Азиядағы ең ірі төрт маусымдық туристік жобаға айналмақ”, — деді шаһар басшысы.
Алматы әкімдігі тұрақты дамуды, кәсіпкерлікті қолдауды және қаланы халықаралық деңгейдегі бәсекеге қабілетті орталық ретінде қалыптастыруды жалғастыра береді.