Қасиетті Рамазан айы басталды – бұл ораза, құлшылық және рухани тазару уақыты.
1 наурыз бен 29 наурыз аралығында әлем мұсылмандары ораза ұстап, ал 30 наурыз күні Ораза айт мейрамын атап өтеді, деп хабарлады Алматы қаласының бас имамы Төлеби қажы Оспан өңірлік коммуникациялар қызметіндегі баспасөз конференциясында.
«Рамазан – сабыр, игі істер және рухани кемелдену айы. Ораза – тек тамақ пен судан тыйылу ғана емес, жан дүниені тазартып, нәпсіні тәрбиелеу», – деп еске салды имам.
Оның айтуынша, қаладағы барлық мешіттерде тарауих намаздары оқылып, Құран хатым түсіріледі.
Жамағаттың ыңғайлылығы үшін Алматы Орталық мешітінде «Рамазан шатырын» орнату жоспарланып отыр. Онда күн сайын 450 адамға тегін ауызашар беріледі.
Сонымен қатар, түрлі дәрістер мен рухани кездесулер ұйымдастырылады.
Имам кәсіпкерлерге үндеу жасап, Рамазан құрметіне әлеуметтік маңызы бар тауарлар мен азық-түлік бағасын 10%-ға төмендетуге шақырды. Сонымен қатар, тұрғындарға қасиетті айда алкоголь өнімдерін сатудан және ішуден бас тарту ұсынылды.
Ай бойы қала мешіттерінде діни дәрістер, түсіндіру жұмыстары және мерекелік шаралар өтеді. Олардың ішінде рухани дәстүрлерді жандандыруға бағытталған «Жарапазан-Party» байқауы да бар.