Алматыда ерекше қажеттіліктері бар адамдар театр өнерін тегін меңгере алады. «Алатау» дәстүрлі өнер театры мүмкіндігі шектеулі жандарға арналған 10 инклюзивті үйірме ұсынуда. Онда қатысушылар би, ән айту, ым тілінде ән орындау, клоунада, есту қабілеті бұзылған, ым-тілін меңгерген жандарға арналған дактилология сабақтарына қатыса алады. Бұл туралы Алматы қаласы Өңірлік коммуникациялар қызметінде өткен баспасөз конференциясында «Алатау» дәстүрлі өнер театрының директоры Мақсат Нұралиев мәлімдеді, деп хабарлайды aqshamnews.kz
Сонымен қатар, ол жоғары нәтижелер көрсеткен қатысушылар шығармашылық ұжым құрамына еніп, алматылық театр сахнасында өнер көрсетуге, сондай-ақ халықаралық байқауларға қатысып, өз талантын әлемдік деңгейде танытуға мүмкіндік алатынын да атап өтті.
«Сабақтар аптасына 3 рет, 2 сағаттан өтеді, оларды театр әртістері мен зағип және есту қабілеті нашар жандар қауымдастығының жетекшілері жүргізеді. Біздің студия-үйірмелерімізде шамамен 200 адам білім алады. Сонымен қатар, Алматы қаласы Мәдениет басқармасының қолдауымен 130 іс-шара өткіздік. Олардың қатарында ерекше қажеттіліктері бар жандарға арналған халықаралық фестивальдер мен байқаулар, қайырымдылық концерттері, дәрістер мен мәдениет қайраткерлерімен кездесулер бар. Біз инклюзивті орта қалыптастыруға ұмтыламыз, онда өнер адамдар арасындағы шынайы байланыс көпіріне айналады, ал біздің әртістер – рух мықтылығы мен шексіз мүмкіндіктердің айқын үлгісі. Бүгінде бізде Италия, Түркия, Қырғызстан, Тәжікстан және Малайзияда өткен халықаралық байқаулардың жеңімпаздары мен лауреаттары бар. Бұл жобаларға біздің әртістер әкімдіктің қолдауымен қатысты», – деді Мақсат Нұралиев.
Атап өтетін жайт, «Алатау» дәстүрлі өнер театрында көру және есту қабілеті бұзылған жандар жұмыс істейтін «Көру және есту қабілеті шектеулі жандарға арналған мәдени демалысты ұйымдастыру бөлімі» табысты қызмет етуде.