Нұрлан Әбдірахым Алматы қаласы әкімінің орынбасары қызметіне кірісті, - деп хабарлайды Аqshamnews.kz тілшісі. Ол бұл лауазымда денсаулық сақтау, жұмыспен қамту және әлеуметтік бағдарламалар салаларына жетекшілік етеді.
Жаңа қызметке дейін Нұрлан Әбдірахым 2023 жылдың сәуірінен бастап Алматы облысы әкімінің бірінші орынбасары болып жұмыс істеген.
Әбдірахым «Қайнар» университетін және Қазақстан Республикасы Президенті жанындағы Мемлекеттік басқару академиясының Мемлекеттік саясат ұлттық мектебін тәмамдаған. Білімі бойынша заңгер, сондай-ақ саясаттану саласында әлеуметтік ғылымдар магистрі дәрежесіне ие.
Еңбек жолын 2001 жылы «Астанаэнергосервис» ашық акционерлік қоғамында абоненттік учаске бақылаушысы ретінде бастаған. Кейін ҚР Әділет министрлігінде түрлі лауазымдарда қызмет атқарып, жетекші маманнан департамент директорына дейін көтерілген, сондай-ақ Зияткерлік меншік комитетінің төрағасы болған.
Сонымен қатар ол ҚР Президенті Әкімшілігінде мемлекеттік инспектор және бөлім меңгерушісінің орынбасары қызметтерін атқарған. Мемлекеттік қызметтегі еңбегі үшін «Құрмет» орденімен және мерейтойлық медальдармен марапатталған.