Алматы қалалық қоғамдық денсаулық сақтау департаментінде де қызметтік тексеру басталды

Мемлекеттік қызмет істері департаменті Алматы қалалық қоғамдық денсаулық сақтау басқармасы басшысының орынбасары Лаура Мырзағалимен болған атышулы видеоға қатысты пікір білдірді, деп хабарлайды Аlmaty-akshamy.kz

Ведомствоның мәліметінше, әлеуметтік желіде тараған видеоға қатысты тексеру басталды.

«Мемлекеттік қызмет істері агенттігінің Алматы қаласы бойынша департаменті Алматы қаласы қоғамдық денсаулық басқармасы басшысының орынбасары Л. Мырзағалиге қатысты видеоны зерттеп жатыр. Департамент өз құзыреті шеңберінде тиісті шаралар қабылдайтын болады», - деді Мемлекеттік қызмет істері агенттігінің Алматы қаласы бойынша департаментінде.

Бұған дейін әлеуметтік желілерде Алматы қалалық қоғамдық денсаулық сақтау басқармасы басшысының орынбасары қызметкермен сыйақы туралы сөз таластырған видео пайда болған еді.

Видеоға қатысты Алматы қалалық қоғамдық денсаулық сақтау департаментінде де қызметтік тексеру басталды.

«Қазіргі уақытта мән-жайды анықтау мақсатында қызметтік тексеру басталды, оның қорытындысы бойынша тиісті шешім қабылданады», - деп түсіндірді қалалық денсаулық сақтау басқармасында.

Сонымен қатар, Алматы әкімінің баспасөз қызметі Лаура Мырзағали қызметінен уақытша шеттетілгенін мәлім етті.