2024 жылы авиациялық бөлімшенің күзетілетін аумағында 10 орман өрті тіркелді, жалпы жану алаңы 434 гектарды құрады. Авиациялық өрт сөндіру қызметінің жедел жұмысының арқасында 8 өрт әуеден сөндіріліп, залал барынша азайтылды. Бұл туралы өңірлік коммуникациялар қызметінің баспасөз конференциясында «Қазавиаорманқорғау» РМҚК Алматы авиациялық бөлімшесінің басшысы Бекзат Байшалов мәлімдеді, деп хабарлайды aqshamnews.kz
«Өртті анықтау деңгейі 75%-ды құрады, ал авиациялық өрт сөндіру қызметінің өртті сөндіруге қатысуы 80%-ға жетті», – деді Байшалов.
Алматылық авиақұтқарушылардың қорғауында 672 мың гектар орман қоры бар, оған үш ұлттық табиғи парк (Іле-Алатау, «Көлсай көлдері», «Шарын»), бір мемлекеттік қорық және жеті коммуналдық мемлекеттік мекеме кіреді. 2025 жылы Іле-Балқаш табиғи резерваты аумағын авиациялық патрульдеу жоспарланып отыр.
2025 жылға қарай авиациялық бөлімшенің штаты толық жасақталған, қызметкерлер медициналық тексерістен және теориялық даярлықтан өтті.
«Біз өрт қаупі жоғары маусымға толық дайынбыз. Өрт сөндіру техникасы, құралдары мен байланыс жабдықтары тексеріліп, толықтай жарамды күйге келтірілді», – деп атап өтті бөлімше басшысы.
Спикер өткен жылы бірқатар жаңартулар жүргізілгенін еске салды: жаңа модификациядағы мотопомпалар, жоғары қысымды қондырғылар, ранцелік ауа үрлегіштер, тұтатқыш құрылғылар, сондай-ақ екі жаңа автокөлік – Jac-T6 және Газель-Соболь сатып алынды.