Алматыдағы А.Чехов атындағы Орталық қалалық кітапханада «Желтоқсан оқиғасы – Тәуелсіздік бастауы» атты әдеби-танымдық кеш өтті. Бұл кештің мақсаты – Желтоқсан оқиғасының тарихи маңызын жастарға түсіндіру, батырлардың ерлігін еске алып, олардың рухына тағзым ету, сондай-ақ, жас ұрпақты патриоттық рухта тәрбиелеу.
Кешке еліміздің тәуелсіздігі үшін күрескен Желтоқсан оқиғасының қаһармандары шақырылды. Тоқтаған Бәкиев, Жүрсін Тастекеев және Бекболат Нүкежанов сол күнгі ауыр сәттері туралы әңгімеледі.
Іс-шараға қаладағы №15 және №147 гимназия оқушылары мен Мәрзия Тұрлыханова атындағы гимназияның оқушылары белсене қатысты. Жас өрендер Желтоқсан рухын дәріптейтін қойылымдар қойып, әсерлі өлеңдер оқыды. Әсіресе, №15 гимназияның оқушылары дайындаған көркем сахналық қойылым Желтоқсан оқиғасының сол бір тарихи сәттерін көрерменге жеткізіп, көңілдерді толқытқан сынды. №147 гимназияның оқушысы Кәусар Айдарбай Серік Әкірамұлының «Тәуелсіз елім» өлеңін нақышына келтіре орындады.
Іс-шара барысында Желтоқсан қаһармандарының ерлігі ғана емес, сол кезеңдегі қазақ халқының бірлігі, ерік-жігері мен азаттыққа деген ұмтылысы, елге, жерге деген сүйіспеншілік сезімдері әсерлі әңгімеленді. Кештің әрбір сәті ұлттық рухты көтеріп отырғандай әсерде болды. Ең бастысы, бұл кеште Тәуелсіз елдің бүгінгі ұрпақтары, жеткіншектердің көп қатысқаны қуантты бізді. Егемен елдің ертеңі – сол өрендердің қолында.