Су ресурстары және ирригация министрлігінің мәліметінше, Алматы облысы Іле ауданында суармалы су тапшылығы жоқ, деп хабарлайды aqshamnews.kz
Алматы облысы Іле ауданы Ақши ауылында 100 га егістік алқап суарылмай, қурап жатыр деген ақпарат тараған болатын. Министрлік жұмыс тобын құрып аумақты барып тексерген.
"Су министрлігінің жұмыс тобы Алматы облысы Іле ауданының Ақши ауылында шаруа қожалықтары мен ауыл әкімдігі өкілдерімен кездесті. Ақши ауылында су тапшылығы салдарынан 100 гектар егіс алқабының құрғап жатқаны туралы бұрын тараған ақпараттың шындыққа жанаспайтыны анықталды", - деп жазды ведомстводағылар.
Шын мәнінде "Қазсушардың" "Д.Қонаев атындағы Үлкен Алматы каналы" филиалымен су жеткізу бойынша келісімшарттары болмағандықтан, 9 гектар жер суарылмаған.
"Елді мекенге су Күрті су қоймасынан оң жағалау магистральдық каналы арқылы жеткізіледі. Суару маусымы 16 мамырда басталған. Ал Үлкен Алматы каналының филиалы сәуір айының аяғында шаруаларды келісімшартқа отыруға шақыра бастаған", - дейді министрлік.
Мамыр айының басында Күрті су қоймасындағы су көлемі 101,68 млн текше метр болды. Бүгінге дейін Оң жағалау магистральдық каналы арқылы 3,6 млн текше метр су берілді, Сол жағалау магистральдық каналы арқылы 6 млн текше метрден астам су берілді.
Су беру жұмыстарының келешекте кешігуіне жол бермес үшін жұмыс тобының өкілдері филиалға суару маусымы басталмай тұрып су беру жөнінде келісімшарттар жасасуды ұсынды. Сондай-ақ каналдарды механикалық әдіспен тазарту мәселесі қарастырылып жатыр.