«Жайлы мектеп» ұлттық жобасы аясында Алматы облысында 2025 жылға дейін 54 600 оқушыға арналған 53 мектеп салу жоспарлануда. Бұл туралы Оқу-ағарту министрінің облыстық мәслихат депутаттарымен кездесуінде белгілі болды, деп хабарлайды almaty-akshamy.kz
Қазіргі уақытта өңірде 1760 білім беру ұйымы, оның ішінде 429 мемлекеттік мектеп жұмыс істейді. Үш ауысымды мектептер мәселесін шешу мақсатында биыл 15 570 оқушыға арналған 16 мектептің құрылысы басталды. Биыл 1 қыркүйекте пайдалануға берілген 9 мектептің 6-уы білім беру инфрақұрылымын қолдау қоры есебінен салынды. Сонымен қатар, сапар аясында Оқу-ағарту министрлігінің қолдауымен тағы 5 мектеп салу туралы шешім қабылданды.
«Біздің міндетіміз — өскелең ұрпақты қауіпсіз және жайлы ортада жан-жақты дамытуды қамтамасыз ету. Министрлік өз тарапынан негізгі мәселелерді шешуде жергілікті атқарушы органды қолдауға дайын. Білім беру инфрақұрылымын дамытумен қатар оқыту сапасын арттырып, тәрбие жұмыстарын күшейтуге, сондай-ақ білім беру ұйымдарын жоғары білікті кадрлармен қамтамасыз етуге ерекше көңіл бөлінеді», - деп атап өтті Ғани Бейсембаев.
Сонымен қатар, биыл 102 пәндік кабинет сатып алынып, 78 мектеп жаңғыртудан өтті. Жеке инвесторлардың қаражаты есебінен тағы екі мектептің құрылысы жүргізілуде.
Естеріңізге сала кетейік, 2023-2024 оқу жылында 132 мың оқушы орнына арналған 154 жаңа мектеп іске қосылады. Бұл 12 апаттық және 29 үш ауысымды мектеп мәселесін шешуге ықпал етеді.