Биыл жер дүмпуі жиілеп кетті.
Қазақстан жер сілкінісі көп тіркелген 101 елдің ішінде 17-орында тұр, деп хабарлайды aqshamnews.kz
Earthquakelist.org порталының дерегі бойынша 1 қаңтардан 25 қарашаға дейін Қазақстанда магнитудасы 4-тен жоғары 259 жер сілкінісі тіркелген.
Бұл сан қазақстандықтар сезінген сілкіністерден әлдеқайда көп көрінеді. Мұның себебі есептеу әдістемесінде: рейтинг құрастырушылар ел шекарасынан 300 км радиуста болған барлық сейсмикалық белсенділікті ескереді.
Қазақстанда сейсмикалық белсенділік нақты қауіп төндіреді. Төтенше жағдайлар министрлігінің Ұлттық сейсмологиялық зерттеулер және бақылау орталығының дерегінше, ел аумағының 40%-ында жер сілкінісі болуы мүмкін. Бұл 7 миллион адам тұратын 400-ден астам елді мекенді қамтиды.
2016 жылғы Қазақстанның сейсмикалық аудандастыру картасына сәйкес, ең қауіпті аймақтар – Алматы облысы мен Алматы қаласы. Мұнда дүмпу 9 баллға жетуі мүмкін. Сондай-ақ, басқа оңтүстік және шығыс аймақтарда 8 баллдық сілкіністер қаупі бар. 7 баллға дейінгі сілкініс қаупі жоғары аймақтарға Абай, Шығыс Қазақстан, Жетісу, Жамбыл, Түркістан және Маңғыстау облыстары кіреді. 6 балл болуы ықтимал жер сілкіністері Батыс және Орталық Қазақстанның жекелеген аумақтарында да болуы мүмкін.