2 қыркүйек күні метроға 117 мың жолаушы мінген, деп хабарлайды aqshamnews.kz
Алматыда метроға мінетін жолаушы ағыны бойынша рекорд орнатылды, бір тәулікте жер асты көлігінің қызметін 117 мың адам пайдаланды. Бұл көрсеткіш – метрополитеннің тарихындағы ең жоғары деңгей.
«2 қыркүйек күні метро арқылы 117 мың жолаушы тасымалданды. Бұл тәуліктік көрсеткіш метрополитен тарихындағы ең жоғарғы көрсеткіш болып есептеледі», – деп жазылған Алматы метросының ресми Instagram парақшасында.
Метро қызметкерлері жолаушылар санының өсуін жаңа оқу жылының басталуымен түсіндірді – қыркүйекте қалада мектеп оқушылары мен студенттердің қозғалысы күрт көбейген.
Қазір Алматы метросында «Райымбек батыр», «Жібек жолы», «Алмалы», «Абай», «Байқоңыр», «Мұхтар Әуезов атындағы театр», «Алатау», «Сайран», «Мәскеу», «Сарыарқа» және «Бауыржан Момышұлы» сияқты 11 станция жұмыс істейді.