Қазіргі таңда елімізде бірнеше ірі инфрақұрылымдық жобалар іске асырылуда. Бұл туралы Президент Ұлттық құрылтайда сөйлеген сөзінде мәлімдеді. 2025-2026 жылдары Қашаған кенішінде газ өңдеу зауыты іске қосылып, «Талдықорған – Үшарал» және «Бейнеу–Бозой-Шымкент» газ құбырларының екінші желісі пайдалануға беріледі.
Сонымен қатар, Үкімет Қызылорда және Түркістан облыстарында бу-газ құрылғысына негізделген жаңа электр стансасын салуды жоспарлап отыр. Алматыдағы ЖЭО-2 және ЖЭО-3 жаңғыртылатын болады.
Президенттің айтуынша, «Кендірлі» демалыс аймағында су тұщытатын зауыт іске қосылады. Бұл зауыт Жаңаөзен қаласын ауыз сумен тұрақты қамтамасыз ететін болады. Қарағанды және Екібастұз қалаларында болат қорытатын зауыттар мен Жамбыл облысында минералды тыңайтқыш өндіретін химия кешені пайдалануға беріледі.
Алматы мен Қостанай облыстарында жаңа автокөлік зауыттары ашылып, ел экономикасына серпін береді. Сондай-ақ, «Достық-Мойынты» темір жол учаскесінің және Алматы бекетін айналып өтетін темір жол желісінің құрылысы аяқталады.
Ақтауда Каспий теңізінің жағалауында контейнер хабы салынып, «Қорғас – Шығыс қақпа» ЕЭА аумағында халықаралық әуежай жұмыс істей бастайды. Зайсан, Катонқарағай мен Кендірлі демалыс аймақтарында да жаңа әуежайлар ашылады.
Президент өз сөзінде Каспий теңізінің ұлтанымен талшықты-оптикалық байланыс желісін тарту жоспарланып отырғанын атап өтті. Бұл жоба Еуропа мен Азия арасындағы цифрлық дәлізді қалыптастыруға мүмкіндік береді. Сонымен қатар, еліміздің автокөлік жолдары желісін дамыту жұмыстарының маңызы ерекше екендігі де айтылды.