"Жаяу жүргінші" жедел-профилактикалық іс-шарасы аясында Медеу аудандық полиция басқармасының қызметкерлері бастауыш сынып оқушыларына жол қозғалысы қағидалары бойынша профилактикалық сабақ өткізді, – деп хабарлайды Aqshamnews.kz Polisia.kz-ке сілтеме жасап.
Сабақ балалардың жас ерекшеліктеріне сай, ойын және интерактив форматта ұйымдастырылып, жолдағы негізгі қауіпсіздік талаптарын жеңіл әрі қызықты түрде меңгеруге мүмкіндік берді. Полиция қызметкерлері оқушыларға жолдың жүріс бөлігін дұрыс кесіп өту тәртібін, жарық шағылыстырғыш элементтердің маңызын, сондай-ақ аула ішінде және оқу орындарының маңында мұқият болу қажеттігін түсіндірді. Іс-шара барысында кәмелетке толмағандардың қатысуымен болатын жол-көлік оқиғаларының алдын алуға бағытталған нақты тәжірибелік кеңестерге басымдық берілді.
– Жол-көлік оқиғаларының алдын алу – бала кезден басталады. Біздің міндетіміз – балаларға қауіпсіздік қағидаларын түсінікті тілде жеткізіп, олардың жолда өзін қорғау дағдыларын қалыптастыру. Осындай сабақтар жауапты мінез-құлықты орнықтырып, жазатайым жағдайлардың тәуекелін азайтуға ықпал етеді, – деді Медеу аудандық полиция басқармасының бастығы Жәнібек Шынасылов.