Алматы қаласының Алмалы ауданындағы комьюнити-орталықта алдағы референдумды қолдауға арналған іс-шара өтті. Кездесуге ауданның белсенді жастары, қоғамдық бірлестіктердің өкілдері және комьюнити-орталық резиденттері қатысты.
Іс-шара meet up форматында ұйымдастырылып, әрбір қатысушы өз ұстанымын ашық білдіруге мүмкіндік алды. Жиын барысында қатысушылар жаңартылған Конституцияның негізгі ережелерін талқылап, ел дамуы үшін маңызы зор өзгерістерге тоқталды. Әсіресе азаматтардың құқықтары мен бостандықтарын кеңейту, азаматтық қоғам институттарының рөлін күшейту және әділеттілік қағидаттарын нығайту мәселелері кеңінен қозғалды.
Алмалы аудандық комьюнити-орталығының жетекшісі Шәмші Құдайберген мұндай кездесулердің маңыздылығын атап өтті:
«Бүгінгі таңда жастармен ашық диалог алаңдарын құру аса маңызды. Конституция – мемлекеттің берік іргетасы. Оның мазмұнын талқылау жастардың құқықтық мәдениетін қалыптастырып, азаматтық ұстанымын нығайтады. Алмалы ауданының жастары қоғамдық-саяси үдерістерге белсенді қатысуға дайын екенін көрсетіп отыр».
Өз кезегінде аудан белсендісі Ернар Серікұлы кездесудің маңызына тоқталды:
«Біз үшін бастамаларды жай ғана қолдау емес, олардың мәнін терең түсіну маңызды. Жаңа Конституцияда азаматтардың құқықтарын қорғау мен мемлекеттің әлеуметтік жауапкершілігін арттыруға ерекше назар аударылған. Осындай кездесулер еліміздің болашағына өз үлесімізді қосуға мүмкіндік береді».
Кездесу қорытындысы бойынша қатысушылар мұндай ашық форматтағы іс-шаралар жастардың құқықтық сауаттылығын арттырып, белсенді азаматтық ұстанымын қалыптастыруға ықпал ететінін атап өтті