Алматыда жасыл желекті күтіп-баптаумен айналысатын мекемелер көпжылдық өсімдіктер отырғыза бастады. Мұндай гүлдер композиция жасауға ыңғайлы дейді мамандар. Көп ұзамай қалада ою-өрнек гүлмен көмкерілген кілемшелер пайда болады.
- Мына гүлдің аты - цинерария. Бұл кілем гүлдерді 1 шаршы метрге 80-90 данадан егеміз. Бізде бұл гүлдер «кілем гүлдері» деп аталады. Бұл гүлдер қыс түскенге дейін тұрады. Цинерария, сальвия, хлорофитум, осы гүлдерді егіп жатырмыз. Жалпы, қала бойынша биыл 180 мың шаршы метр аумаққа гүл егіледі. Мамандардың айтуынша, бір қала болғанымен, әр ауданның өзіндік климаттық ерекшелігі бар. Гүлдің сұрпы да соған қарай таңдалады. Гүлзардың көбі Медеу ауданында. Себебі, бұл жақта ортақ қолданыстағы саябақ пен аллея көп, - дейді Дәмеш Елшібекова.
- Бізде қала аумағында біржылдық және көпжылдық гүлзарлар отырғызылады. 2019 жылдан бастап көпжылдық гүлзарларды көбейтіп жатырмыз. Бізде 2019 жылы көпжылдық гүлзарлардың көлемі 17 пайыз болатын. Қазір ол көлем 60 пайызға дейін өсті. Көпжылдық гүлзарларды көктем және күз мезгілінде отырғызамыз. Алматыда наурыз айында қызғалдақтар бүр жарады. Оны күзде егіп тастайды. Көпжылдық өсімдіктер сұрпына қарай ерте көктемнен сары күзге дейін гүлдейді. Раушан, қалампыр, сары түймедақ, қоңыраугүл мен сиягүл қаланың ажарын ашып тұр, - дейді Экология және қоршаған ортаны қорғау басқармасының маманы Нұркен Ақмырза.
Алматыда гүл отырғызу жұмыстары маусымның ортасына дейін жалғасады.