Алматы Euronews эфирінде: халықаралық аудиторияға шаһардың туристік келбеті таныстырылды, – деп хабарлайды aqshamnews.kz тілшісі.
Алматы әлемдегі ең ірі ақпараттық медиаресурстардың бірі Euronews телеарнасының Modern Nomads халықаралық бағдарламасының жаңа шығарылымына арқау болды. Арнаның Еуропа мен әлем бойынша миллиондаған аудиториясы бар. Қазақстандағы Euronews бюросы бір жылдан астам уақыт бойы ел мен Орталық Азиядағы маңызды оқиғаларды жариялап, өңірдің мәдени және туристік әлеуетін халықаралық аудиторияға насихаттап келеді.
Бағдарламаның жаңа шығарылымы Қазақстанның ең ірі мегаполисі Алматыға арналды. Қала табиғаты, қалалық мәдениеті мен белсенді өмір салты үйлескен заманауи туристік орталық ретінде көрсетілді. Бағдарлама Euronews телеарнасында эфирге шығып, арнаның цифрлық платформаларында да жарияланды.
Эпизод аясында көрермендер Алматының танымал туристік орындарымен танысты. Солардың бірі Іле Алатауы баурайындағы әйгілі «Денсаулық баспалдағы». Алматы мен тау көрінісін тамашалауға мүмкіндік беретін бұл бағыт қала тұрғындары мен туристер арасында кеңінен танымал. Бағдарлама авторлары 842 баспалдақтан тұратын маршруттың Алматының outdoor-мәдениетінің символына айналғанын атап өтті.
Сондай-ақ, шығарылымға Көктөбе, Көк базар, Алматы заманауи өнер музейі және қаланың рухын, гастрономиясы мен мәдени әралуандығын айқындайтын танымал арт-нысандар енді. Авторлар шаһардың табиғи ландшафтары, заманауи қалалық ортасы мен бай мәдени мұрасының үйлесіміне ерекше назар аударған.
Алматы туралы бағдарламаның Euronews платформасында жариялануы халықаралық медианың қалаға деген қызығушылығы артып келе жатқанын тағы бір мәрте дәлелдеп, Алматының туристік әлеуетін еуропалық аудитория арасында кеңінен насихаттауға мүмкіндік береді.