Алматыда «Есірткіге жол жоқ» атты есірткіге қарсы ауқымды флешмоб өтті, – деп хабарлайды aqshamnews.kz тілшісі.
Алматыда ҚБТУ ғимаратының алдындағы алаңда «Есірткіге жол жоқ» атты есірткіге қарсы флешмоб ұйымдастырылды. Іс-шараға мемлекеттік органдардың өкілдері, жастар ұйымдары, еріктілер мен қала тұрғындары қатысып, салауатты өмір салтын қолдау және есірткінің таралуына қарсы күреске өз үндерін қосты.
Шара жыл сайын 26 маусымда атап өтілетін Халықаралық нашақорлыққа және есірткінің заңсыз айналымына қарсы күрес күніне орай және есірткіге қарсы айлық аясында өтті.
Флешмобтың басты сәті – көлемі 10×5 метр болатын, «Есірткіге жол жоқ» деген жазуы бар алып тудың салтанатты түрде жайылуы болды. Бұл символдық әрекет қоғамның есірткі қаупіне қарсы бірлігін және жас ұрпақ үшін қауіпсіз орта қалыптастыруға деген ортақ ұмтылысын көрсетті.
Іс-шараға Алматы қаласы Полиция департаментінің Есірткі қылмысына қарсы іс-қимыл басқармасының қызметкерлері, «Жастар Рухы» жастар қанатының өкілдері, Алмалы аудандық прокуратурасы, аудан әкімдігі, еріктілер ұйымдары, жоғары оқу орындары мен колледждердің студенттері, есірткі құқықбұзушылықтарының алдын алу жөніндегі кеңес мүшелері, қоғам қайраткерлері және белсенді қала тұрғындары қатысты.
Флешмобқа қатысушылар жастар арасында профилактикалық жұмысты күшейтудің, халықтың есірткінің зияны туралы ақпараттануын арттырудың және азаматтарды салауатты өмір салты мәдениетін қалыптастыруға тартудың маңызын атап өтті.
Ұйымдастырушылардың айтуынша, мұндай акциялар қоғамның есірткі қатеріне қарсы иммунитетін нығайтып, мемлекет пен қоғамның есірткі қылмысына қарсы күрестегі күш-жігерін біріктіреді. Сондай-ақ, әр адамның өз денсаулығы мен ел болашағына жауапкершілікпен қарауы қажет екенін еске салады.
Флешмоб соңында қатысушылар жайылған алып тудың аясында естелік суретке түсіп, барша жұртшылықты салауатты әрі қауіпсіз өмір салтын ұстануға шақырды.