Дауыс беру жоғары ұйымдастырушылық деңгейде өтуде.
395-сайлау учаскесі Орналасқан №5 Қалалық клиникалық аурухананың пациенттері алғашқылардың бірі болып дауыс берді, деп хабарлайды almaty-akshamy.kz.
Сайлау комиссиясының төрағасы Данияр Амировтың айтуынша, бүгін учаскеде стационарлық емделуде жүрген 100-ден астам адам дауыс береді деп жоспарлануда.
«Бұл үшін барлық қажетті жағдайлар жасалған, науқастардың тізімі алдын ала дайындалған, референдум туралы ақпарат бар. Қарт адамдарға, жүре алмайтын және қозғалуы қиын науқастарға арнайы дауыс беру жәшігі ұйымдастырылған. Барлық талаптар сақталуда, учаскеде бақылаушылар бар», - деп атап өтті сайлау комиссиясының төрағасы.
«Жас бақылаушы» бірлестігінің өкілі Жібек Айдайқызы учаскенің жұмысын ашуға алдын ала келді. Ол республикалық референдум – бүкіл ел үшін маңызды саяси оқиға, сондықтан оған ерекше назар аударылуда, байқаушылардың миссиясы: дауыс берудің заң аясында өтуін қадағалау екенін атап өтті. Сонымен бірге, емдеу мекемесіндегі науқастардың дауыс беруі жоғары ұйымдастырушылық деңгейде өтіп жатқандығын айтты.
«Дауыс беру процесі белгіленген талаптарға сәйкес жүріп жатыр, заң бұзушылықтар тіркелген жоқ. Емделіп жатқан азаматтар сайлаушылар тізіміне енгізіліп, белсенді түрде дауыс беруде, барлық ұйымдастырушылық-техникалық мәселелер шешілген, комиссия заң талаптарын сақтап жұмыс істеуде», - деді бақылаушы.