«Almaty Clean&Green». Мереке қарсаңында Наурызбай ауданында өткен экологиялық акция осылай аталады. Республикалық «Таза Қазақстан» бағдарламасы мен қаламыздағы «Алматы – ортақ үйіміз» эко-науқаны қазір жаңарудың жаршысы әз-Наурызбен тіпті де астасып, айрықша мәнге ие бола түсті.
Алматы қаласы әкімінің орынбасары Азамат Қалдыбеков қатысқан бүгінші экологиялық акцияға экологтар, еріктілер мен беленділер, сондай-ақ, аудан тұрғындары да атсалысты.
Шараның басты мақсаты – ұлттық мереке қарсаңында рухани тазару, ұлттық болмысқа мән беру. Сондай-ақ, қоршаған ортамызды, айналамызды таза ұстауға күш салу. Нәтижесінде төңіректегі арықтар аршылып, орындықтар, аулалар тазартылды.
– Бүгін – Мемлекет басшысы бастамасымен жүзеге асқан «Наурызнама онкүндігі» бағдарламасындағы «Тазару күні». «Таза Қазақстан» акциясы аясында экологиялық науқанға қала әкімі бастамашылық етіп, зиялы қауым мен мәдениет өкілдері басқа да сала қызметкерлері атсалысуда. Қоршаған ортаны таза ұстау – ел мен жерге деген ізгі құрметтің белгісі. Мақсат – табиғатқа жанашырлық сезімін, ортаны қорғау мәдениетін қалыптастыру,_ – деді Азамат Қалдыбеков.
Қолға алынған игі істер, атқарылып жатқан ілкімді шаруалардің нәтижесі жайында эко-белсенділер де өз ойларын ортаға салып, әлеуметтік өмірдегі қоршаған орта тазалығының маңызы жайында көзқарастарын бөлісті.
– Бұл экологиялық акцияға 500-ден аса адам жұмылдырылды. Қатысушыларды ынталандыру үшін 10 номинация бойынша бағалау түзімін де қостық. Осындай сенбіліктің арқасында қала тазаланып, аула гүлденіп, айнала жинақы тұрады, – деді Наурызбай ауданы әкімінің орынбасары Айнұр Бекжанова.
Ал Наурызбай ауданы Көріктендіру бөлімінің басшысы Оңалбек Қыдырбаев сенбіліктің барысын егжей-тегжейлі түсіндірді:
– Сенбілікте орындық, шарбақ, жақтауларды боялып, қураған қуранды шөптер шабылып, жалпы қыстан кейінгі тазалау жұмыстар жасалды. Сондай-ақ ағаш егіліп, талдардың түбі қопсытылып, қоқыс шығарылып, жарық шамдар жөнделді. Тазалау жұмыстары Абай даңғылының Алатау мен Строительная көшелерінің аралығын қамтыды,_ – деді ол.