Алматыдағы Ботаникалық бақта аққуды мойнынан қылқындырған 1983 жылғы ер адам бір тәуліктің ішінде анықталып, ұсталды. Кейін сот оған жеті тәулікке әкімшілік қамау жазасын тағайындады, деп хабарлайды Aqshamnews.kz Ботаникалық бақтың баспасөз қызметіне сілтеме жасап.
5 тамызда әлеуметтік желілерде ер адамның Ботаникалық бақ аумағында аққуды мойнынан қылқындырған сәті түсірілген видео тараған. Бұл жағдай қоғамның ашу-ызасын тудырды. Полицияның жедел әрекеті мен бақ қауіпсіздік қызметі берген бейнебақылау деректері арқасында құқық бұзушы анықталып, ұсталды.
Алматы қалалық сотының мәліметінше, бүгін өткен сот отырысында ер адамға жеті тәулікке әкімшілік қамау жазасы кесілді.
Ботаникалық бақ әкімшілігі бақ аумағы ерекше қорғалатын табиғи аймақ екенін, мұндағы жануарлар мен өсімдіктердің арнайы қорғауда болатынын еске салды. Аққудың жағдайын орнитолог мамандар тұрақты деп бағалады. Жақын уақытта аққулар тоғанының айналасына қоршау орнату жоспарланып отыр.
Сондай-ақ, бақта келушілер санының артуына байланысты ережені бұзу оқиғалары да көбейген: көгалды таптау, өсімдіктерді зақымдау, қоқыс тастау, рұқсатсыз пикник өткізу. Тәртіпті сақтау үшін әкімшілік «Жасыл Патруль» еріктілерінің көмегіне жүгінуді жоспарлап отыр.