2025 жылы тоғыз ай ішінде Алматының жергілікті бюджет кірісі 1,6 трлн теңгеге жетті. Бұл өткен жылдың осы кезеңімен салыстырғанда 20% жоғары. Жыл қорытындысы бойынша қала бюджетіне түсетін жалпы түсім көлемі 2,3 трлн теңгеден асуы мүмкін. Бұл қала тарихындағы рекордтық көрсеткіш.
Бюджет кірістерінің артуы Алматының тұрақты дамып келе жатқанын көрсетеді. Қалада ауқымды экономикалық және әлеуметтік бастамалар жүзеге асырылып келеді. 35 жыл ішінде Алматы жасампаздық пен дамудың символына айналып, оның жетістігі бүкіл елдің мақтанышына айналды.
Шаһарда кәсіпкерлік пен инновацияны қолдайтын жаңа бизнес-алаңдар мен технопарктер құрылып жатыр. Әлеуметтік тұрғыдан аз қамтылған отбасыларды, зейнеткерлерді және мүмкіндігі шектеулі азаматтарды қолдау шаралары күшейтіліп отыр.
Тұрғын үй-коммуналдық шаруашылығына, көлік инфрақұрылымына және денсаулық сақтау саласына «ақылды» технология енгізіліп, қаланы басқарудың тиімділігі мен тұрғындардың өмір сүру сапасы артып отыр.
Алматы күн сайын жаңарып, экономикалық өсім, инновация және адамға деген қамқорлықты үйлестіре отырып, болашақтың заманауи, тұрақты және жайлы қаласына айналып келеді.