Алматы қаласы Білім басқармасы мемлекеттік білім беру ұйымдарының басшыларын іріктеуге арналған ашық конкурс жариялады. Конкурс Ілияс Есенберлин атындағы №25 гимназияның директоры лауазымына өткізіледі, - деп хабарлайды Aqshamnews.kz.
Гимназия 1999 жылдан бері жұмыс істейді. Лауазымдық жалақы жұмыс өтіліне қарай 202 807–245 988 теңге аралығында белгіленеді.
Үміткерлерге қойылатын негізгі талаптар:
– жоғары педагогикалық білім немесе педагогикалық қайта даярлау;
– кемінде 5 жыл педагогикалық жұмыс өтілі, соңғы 2 жылы үздіксіз;
– басшы немесе директордың орынбасары ретінде кемінде 2 жыл тәжірибе;
– біліктілік санатының (педагог-сарапшы, зерттеуші, шебер және т.б.) болуы артықшылық береді;
– QAZTEST немесе Qazaq Resmi Test сертификаты (В1 деңгейінен төмен емес).
Үміткер білім беру ұйымын басқару, педагогикалық процесті ұйымдастыру, материалдық-техникалық базаны дамыту, қауіпсіздікті қамтамасыз ету, кадрлық саясат жүргізу және қаржылық есептілік дайындау сияқты міндеттерді орындайды.
Құжаттар қабылдау мерзімі - конкурс туралы хабарландыру ресми басылымдарда («Алматы ақшамы», «Вечерний Алматы») және edualmaty.kz сайтында жарияланған сәттен бастап 7 жұмыс күні ішінде жүргізіледі.
Өтінімдер Алматы қаласы, Республика алаңы, 4 (Алматы қаласы Білім басқармасы) мекенжайы бойынша немесе электронды пошта арқылы қабылданады: service.ok.2@mail.ru
Әңгімелесуге жіберілген кандидаттар тізімі басқарманың сайтында жарияланады. Үміткерлер әңгімелесуді офлайн форматта өтеді.