Әуежайдың халықаралық ұшуларға арналған тіркеу бағанында Өзбекстан Республикасының 18 жастағы азаматы қалжың түрінде өз жүгінде «атом бомбасы» барын айтып, қоғамдық тәртіп пен азаматтардың тыныштығын бұзған, деп хабарлайды aqshamnews.kz
Шетел азаматы ҚР ұсақ бұзақылық бойынша әкімшілік жауапкершілікке тартылып, оған 20 АЕК (78 640 теңге) көлемінде айыппұл салынды.
Көліктегі полиция департаментінің мәліметінше, жыл басынан бері түрлі әкімшілік құқықбұзушылықтар жасағаны үшін жолаушылар поездары мен ұшақтардан акт бойынша 900 деструктивті жолаушыны, яғни, оның 489-ы жолаушылар пойыздарынан, ал 411-і әуе кемелерінен түсірілген.
Тиісті нормалар мен ережелерді бұзу көп жағдайда азаматтардың алкогольдік ішімдіктерді ішу немесе қоғамдық орындарға масаң күйде келулермен байланысты. Сондай-ақ, ұсақ бұзақылық, вагондарда темекі шегу және басқа да бұзушылықтар болған.
- Мұндай деректер жиі кездеседі. Жолаушылар мұндай әрекеттерінің соңы құқықтық жауапкершілікке әкеліп соғатынын білмей жатады. Көлік полициясы кез келген көліктегі жағдайды тұрақсыздандыру немесе қорқыту әрекеттері елеулі қауіп ретінде қарастырылатынын және кінәлілер қолданыстағы заңнамаға сәйкес жауапкершілікке тартылатынын тағы да еске салады, делінген хабарламада.