Алматы әкімі Дархан Сатыбалды тұрғындарды жеке мәселесі бойынша қабылдады. Тұрғындар әлеуметтік қолдау, медициналық көмек, инженерлік инфрақұрылым, көріктендіру, көлік қауіпсіздігі, тұрғын үй саясаты және жер қатынастары және т.б. жайттарды көтерді.
Қала тұрғындарына жеңілдіктер алу тәртібі, медициналық қызмет көрсету және баспана беру тетіктері жөнінде заңнамалық түсініктеме берілді.
Өтініштердің басым бөлігі инженерлік желілерге, су сапасына, жолды қалпына келтіруге, газ коммуникацияларының жай-күйіне және аула маңын абаттандыруға қатысты болды. Сондай-ақ, балалар ойын алаңдарын орнату және қалдық жинау жүйесін жетілдіру жөнінде ұсыныстар айтылды.
Алматы әкімі атқарылған жұмыстардың сапасын бақылауды күшейтуді, жол төсемін қалпына келтіруді жеделдетуді және бірқатар ауданда қосымша жерасты контейнерлерін орнатуды тапсырды. Көлік қауіпсіздігіне байланысты тұрғындардың реттелетін жүргінші өткелдеріне қатысты өтініштері де қаралды. Бұл жобалар 2026 жылға арналған жоспарға енгізілді.
Сонымен қатар Бас жоспарды түзету, жер телімдерінің жалдау мерзімін ұзарту, мемлекет қажетіне жер алу рәсімдері сынды қала құрылысы саясатына қатысты жайттар да талқыланды.
Қабылдау қорытындысы бойынша қала басшысы шешімін күткен жедел мәселелерді тиісті басқармаларға тапсырды, барлық рәсімнің ашық әрі түсінікті болуын және берілген тапсырмалардың орындалуын қатаң бақылауда ұстауды жүктеді. Дархан Сатыбалды тұрғындармен ашық диалог – қалалық ортаны жақсартудың негізгі тетігі екенін атады.
Айта кетейік, азаматтарды жеке мәселесі бойынша қабылдау тұрақты түрде өткізіледі. Алматы әкімі аудан тұрғындарымен ұдайы кездесіп, жобалардың орындалу барысын жергілікті жерде бақылайды.