Кеше Алматы әкімі Дархан Сатыбалды Түрксіб ауданындағы «Тамарикс» тұрғын үй кешенінің тұрғындарымен жүздесті. Тұрғындар қазандықтың жұмысы, аумақты жарықтандыру және басқарушы компанияның қызметіне қатысты мәселелерді көтерді. Бұл тақырыптар бұған дейін де азаматтарды жеке қабылдау кезінде қозғалған болатын.
Жылумен қамтамасыз ету мәселесі биылғы қыркүйек айының соңына дейін шешіледі. Қаланың Құрылыс басқармасының мердігер ұйымы «АТКЭ» ЖШС-мен және құрылыс компаниясымен бірлесе отырып, қолданыстағы қазандықты қосымша жабдықтау жұмыстарын бастады.
Тұрғын үй кешені аумағын жарықтандыру бойынша да оң шешім қабылданды. Сондай-ақ тұрғындар балаларға арнап футбол алаңын салуды ұсынды. Қала әкімі бұл жобаны іске асыру мүмкіндігін қарастыруды тапсырды.
Кездесу барысында басқарушы компанияның жұмысына байланысты шағымдар да түсті. Барлық өтініш заң аясында тіркеліп, қаралады. 15 қыркүйектен бастап «Тұрғын үй қатынастары туралы» заңға енгізілген өзгерістерге сәйкес, тұрғындарда басқарушы компаниялардың қызметін бақылауға қосымша мүмкіндіктер пайда болады.