Түркия Республикасының Қазақстан Республикасындағы Төтенше және Өкілетті Елшісі Мұстафа Капуджудың Алматы қаласына алғашқы сапары кезінде экономикалық, сауда және инвестициялық салалардағы ынтымақтастық мәселелері талқыланды, деп хабарлайды almaty-akshamy.kz
Алматы әкімі Ерболат Досаев атап өткендей, қазіргі уақытта қалада түрік капиталының қатысуымен бірқатар жобалар табысты жұмыс істеуде. TAV Airports холдингі Алматы халықаралық әуежайының жаңа терминалын салу бойынша жұмысты бастады, ол әуе айлағының өткізу қабілетін жылына 14 млн жолаушыға дейін екі есеге арттырады. Iskefe Holding халықаралық концерні желатин өндіретін зауыттың құрылысын жүргізуде. Celkonsan Stroy ЖШС металл тосқауыл қоршауларын, көпірлер мен жол топтарына арналған қоршауларды өндіру жобасын іске асыруда. Басқа да маңызды бірлескен жобалардың қатарына Nobel Pharmaceuticals фармацевтикалық өндірісі («Нобель АФФ» АҚ), панельдер, тоңазытқыш және мұздатқыш камералар шығаратын Akay Trade ЖШС, Orhun Medical ЖШС диагностикалау және емдеу үшін медициналық орталықтар желісі, т.б. кіреді.
Қала басшысының айтуынша, түрік кәсіпорындары ұзақ мерзімді жоспарлар құрып, өз қызметін кеңейту мүмкіндіктерін іздейді. Түркиядан капитал тарту қала экономикасының дамуына қуатты серпін береді.
Ең ірі инвестициялық жобалар Алматының индустриялық аймағында және «Инновациялық технологиялар паркі» арнайы экономикалық аймағында іске асырылуда, онда компанияларға инженерлік инфрақұрылымға қолжетімділік берілді, бизнесті жүргізу үшін жеңілдікті жағдайлар енгізілген.
Түркия ең ірі 10 инвестордың қатарына кіреді: 2005 жылдан бастап шамамен 1,2 млрд АҚШ доллары тартылды (ҚР бойынша тікелей шетелдік инвестициялар көлемі 4,6 млрд АҚШ долларын құрады). Қазақстанда түрік капиталы бар барлық кәсіпорындардың жартысынан көбі Алматыда орналасқан – 2302 (Қазақстанда – 4280). 2022 жылы Алматы қаласы мен Түркия Республикасы арасындағы тауар айналымы шамамен 1 млрд АҚШ долларын (977 млн АҚШ долларынан астам) құрады, бұл өткен жылмен салыстырғанда 64%-ға артық (2021 жылы – 596 млн).
Тараптар Алматы мен Түркия арасындағы ынтымақтастық біздің халықтарымыздың тығыз бауырластығына негізделген кеңейтілген стратегиялық әріптестік рухында дамып келе жатқанын атап өтті. Кездесу қорытындысы бойынша серіктестікті одан әрі нығайту туралы уағдаластықтарға қол жеткізілді.