Алматы әкімі Дархан Сатыбалды тұрғындарды жеке мәселесі бойынша қабылдады. Кездесу барысында инженерлік және коммуналдық инфрақұрылымды дамыту, жол желісін жетілдіру, тұрғын үй-коммуналдық шаруашылығы, жер қатынастары, қала құрылысы, қоғамдық көлік және еңбек құқығын қорғауға қатысты өтініштер қаралды, – деп хабарлайды aqshamnews.kz тілшісі.
Тұрғындар сумен жабдықтау және су бұру желілерін салу мен жаңғырту, көппәтерлі тұрғын үйлерді жөндеу мәселесін көтерді. Сонымен қатар, аумақты көркейту, көшені асфальттау, көлік инфрақұрылымын ұйымдастыру, жер телімдері мен жылжымайтын мүлік нысандарын рәсімдеу, қала құрылысы заңнамасының сақталуы талқыланды. Бұдан бөлек, жалақыны уақытылы төлеу, сенімді электрмен жабдықтауды қамтамасыз ету және әлеуметтік нысандарды іске асыруға да баса назар аударылды.
Әрбір өтініш бойынша Алматы әкімі тиісті басқармалар мен аудан әкімдеріне қозғалған жайттарды жан-жақты қарастыру, қолданыстағы заңнама аясында қажетті шара қабылдау, сондай-ақ тиімді шешім табу үшін ведомствоаралық өзара іс-қимылды күшейту жөнінде нақты тапсырмалар берді.
Кездесуде көтерілген барлық өтінішті қала әкімі жіті бақылауына алды.