Алматы әкімі Дархан Сатыбалды AMANAT партиясының Алматы қалалық филиалында тағы да азаматтарды қабылдады, – деп хабарлайды aqshamnews.kz тілшісі.
Кездесу барысында ерекше қажеттілігі бар адамдарды қолдау, тұрақты сумен жабдықтауды қамтамасыз ету, тұрғын үй кешендеріндегі инженерлік инфрақұрылымның жай-күйі, электрлі самокаттарының қозғалысын реттеу және т.б. мәселелер қозғалды.
Атап айтқанда, ерекше қажеттілігі бар адамдарға арналған оңалту инфрақұрылымын дамыту, Наурызбай ауданы тұрғындарын тұрақты сумен қамтамасыз ету үшін Ақсай өзеніндегі су тарту нысанының құрылысын аяқтау жөніндегі мәселелер қаралды. Сонымен қатар, тұрғындар «Восточный парк» тұрғын үй кешенін электрмен жабдықтау және Алғабас шағынауданындағы жаңа мектеп маңындағы жүргіншілер қауіпсіздігін күшейту жөніндегі өтінішін жеткізді.
Кездесу соңында тұрғындардың барлық өтініші бақылауға алынып, жауапты мемлекеттік органдарға тиісті тапсырмалар берілді.
Айта кетейік, AMANAT партиясы алаңындағы азаматтарды қабылдау тұрақты түрде өткізіліп келеді. Бұл халықпен тікелей байланыс орнатудың тиімді тетіктерінің бірі саналады.
Жыл басынан бері қалалық мәслихат депутаттары 80-нен астам қабылдау өткізіп, онда тұрғындардан түскен 1 мыңнан астам өтініш қаралған. Бұған қоса, мемлекеттік органдардың басшылары 70-тен астам азаматты қабылдаған.