Жұмыс сапары барысында қала әкімі Дархан Сатыбалды Түрксіб ауданындағы «Altyn City» тұрғындарымен жүздесті.
Кездесуде тұрғындар инженерлік инфрақұрылымға қатысты мәселелерді көтерді. Атап айтқанда, жарықпен қамту, қазандықтардың жұмысы және инженерлік желілердің жағдайы сөз болды.
Құрылыс компаниясы салған электр желілері әлі қала балансына өткізілмеген. Сонымен бірге тұрғын үй кешенін «Тұздыбастау» қосалқы стансасына қосатын резервтік кабель тартылмаған.
Аумағында екі қазандық бар, екеуі де құрылыс компаниясының иелігінде. Соның бірі 15 үйге есептелген, қазір апатты жағдайда. Дархан Сатыбалды құрылыс компаниясына оны жылыту маусымына дейін жөндеуді және бүкіл аумақты қамтитын жаңа қазандық салуды тапсырды.
Дәл осындай жағдай ауызсу, кәріз және газ желілерінде де бар – олар да қала балансына өтпеген. Әкім құрылыс компаниясына, Құрылыс басқармасына және аудан әкімдігіне бұл мәселелерді қыркүйек айының соңына дейін шешуді жүктеді.
Жыл соңына дейін мұнда 1500 орындық мектеп ашылады. Сондай-ақ құрылыс компаниясы балабақша салуды жоспарлап отыр.