Орталық коммуникациялар қызметі алаңында өткен брифинг барысында Алматы қаласының әкімі Дархан Сатыбалды мегаполисте жайлы қалалық орта қалыптастыру және инженерлік инфрақұрылымды жаңарту бағытында жүйелі шаралар жүзеге асырылып жатқанын айтты.
Әкімнің айтуынша, 2025 жылы Алматыда жалпы ұзындығы 49 шақырым болатын 11 көшеде кешенді көріктендіру жұмыстары аяқталды. Қазіргі уақытта Достық даңғылының әл-Фараби даңғылынан Абай даңғылына дейінгі бөлігі, сондай-ақ Пушкин көшесінің Гоголь көшесінен Райымбек батыр даңғылына дейінгі аралығында көріктендіру жұмыстары жалғасып жатыр.
Сыртқы жарықтандыру жүйесін дамыту мен жаңғыртуға ерекше назар аударылып отыр. Қабылданып жатқан шаралар бұрын жарықтандырылмаған 1 100-ден астам аумақты қамтыды.
Бағдарлама аясында 12 мыңнан астам жаңа жарық шамы орнатылып, сондай-ақ 20 мыңнан аса ескі жарықтандыру құралдары ауыстырылып жатыр. Осылайша, жыл соңына дейін Алматы қаласында 32 мыңнан астам жарық шамы орнатылады.
Сонымен қатар, 400 нысанда сәндік-сәулеттік жарықтандыру жүйелері енгізілуде. Қабылданған кешенді шаралардың нәтижесінде қала толықтай сапалы сыртқы жарықпен қамтамасыз етіледі. Бұл бағыттағы жұмыстар 2026 жылы да жалғасады.
Сондай-ақ, қала әкімі Алматы қаласында сумен жабдықтау және кәріз жүйелерін жаңғырту жұмыстары жүргізіліп жатқанын мәлімдеді. 2025 жылы 330 шақырым жаңа су құбыры желісі салынды, 60 шақырым қолданыстағы желі жаңартылды. Су ресурсын тиімді пайдалану мақсатында жеке есептеу құралдарын орнату жұмыстары күшейтілді: жыл басынан бері 84,8 мың суық су есептегіші орнатылып, құрылғылармен жабдықталу деңгейі 67 %-дан 87 %-ға дейін өсті. Бұл су ресурстарын тиімді басқару мен шығынды азайтуға мүмкіндік беріп отыр.
Сонымен қатар жылу, электр және газбен жабдықтау инфрақұрылымын жаңарту аясында 39 шақырым жылу желісі қайта жаңғыртылып, 17 қазандық жаңартылды. Электрмен жабдықтау саласында 221 шақырым желі қайта жаңғыртылды, оның ішінде 115 шақырымы "АЖК" АҚ-ның инвестициялық бағдарламасы есебінен іске асырылды. Газбен жабдықтау бағытында 6,5 шақырым жаңа желі пайдалануға беріліп, Түрксіб ауданында 4 шақырымнан астам магистральдық газ құбырын салу жұмыстары басталды", – деді Дархан Сатыбалды.