№127 мектептің күрделі жөндеуі қанағаттанарлықсыз жүргізілді, деп мәлімдеді Ерболат Досаев Алматының Әуезов ауданындағы нысанды аралау барысында, деп хабарлайды Almaty-akshamy.kz
«BEREKET-TK» ЖШС мердігерлік ұйымына бірқатар сұрақтар мен шағымдар бар, қала басшысы барлық ескертулерді жедел жоюды тапсырды – мектеп балаларды қабылдауға толық дайын болған жағдайда ғана ашылуы мүмкін.
№127 мектеп 1988 жылы салынған, содан бері ғимаратта жөндеу жұмыстары жүргізілмеген. Қауіпсіздік пен білім берудің заманауи нормаларына сәйкес келу үшін Алматы әкімінің тапсырмасы бойынша 2,4 млрд теңге бөлінді. Күрделі жөндеу жұмыстары 2022 жылдың қазан айында басталды, қазіргі уақытта жұмыстар 95% - ға аяқталды.
Қала басшысына жұмыс барысында сейсмикалық күшейту, шатырды, ғимаратты, жылыту жүйесі мен су құбырын жөндеу, бүкіл аумақ бойынша қоршауды ауыстыру, спорт кешенін орнату жұмыстары жүргізілгені баяндалды. Қазіргі уақытта мердігер ұйым аумақты абаттандырумен айналысуда.
Ерболат Досаев құрылыс басқармасы басшылығының назарын мердігерлік ұйым жүргізген жобалық жұмыстардың сапасына аударды: қала басшысы күзгі-қысқы кезеңде балаларға ыңғайлы болу үшін мектепке кіре берісте резеңкеленген учаскелердің болмауына, қабырғаларды бояуға қатысты талаптарды айтты. Қала әкімі сондай-ақ балалардың құлауы мен жарақаттануын болдырмау үшін мектептегі табалдырықтарды қайта жабдықтауды, дәретханадағы раковиналар аймағындағы электр сымдарын оқшаулауды, желдетудің техникалық бұзылуын жоюды және оқушыларға ыңғайлы және жайлы болу үшін ауланы абаттандыруды тапсырды.
Бұдан басқа, құрылыс-монтаж жұмыстарының сапасын техникалық қадағалауды жүзеге асыратын компанияға ескерту жасалды.
Белгіленген мерзімге сәйкес, мектеп ағымдағы жылдың қараша айында ашылуы керек еді. Қала басшысы мердігерге желтоқсан айының соңына дейін барлық олқылықтарды жоюға уақыт берді.