Биыл Қазақстан Республикасы ІІМ Мақан Есболатов атындағы Алматы академиясына 300-ден аса курсант қабылданды, – деп хабарлайды aqshamnews.kz тілшісі.
Курсанттар өміріндегі маңызды қадам – Ант қабылдау рәсіміне Ішкі істер министрлігінің басшылығы, генералдар мен ардагерлер, курсанттардың ата-аналары қатысты.
Ант қабылдау алдында оқуға жаңадан қабылданған курсанттар бірнеше апта бойы оқу-далалық жиыннан өтіп, күн тәртібіне бейімделді, дене шынықтыру және саптық дайындықтан, тактикалық сабақтардан өтті. Бұл кезең олардың Академиядағы алғашқы оқу жылына бейімделуіне мүмкіндік берді.
Ант қабылдау кезінде курсанттар Қазақстан Республикасына адал болуға, Конституция мен заң талаптарын сақтауға, азаматтардың құқықтары мен бостандықтарын қорғауға және ішкі істер органдары қызметкерінің міндеттерін абыроймен атқаруға салтанатты түрде ант берді.
Жас курсанттарды ардагерлер мен Академия басшысы құттықтап, таңдаған мамандыққа жауапкершілікпен қараудың маңызын атап өтті.
«Ант – үлкен жауапкершілік. Оны күнделікті еңбекпен, тәртіптеріңімен және қызметке деген адалдықтарыңмен дәлелдеулерің қажет», – деді Академия бастығы полиция полковнигі Қалижан Қобландин.
Бүгінгі сапта тұрған жас курсанттар үшін алда бірнеше жылдық оқу, кәсіби дайындық және болашақ қызметке қалыптасу кезеңі тұр.